विराटनगर–१० मा औषधि व्यवसायी गर्दै आएका देवीप्रसाद दुलालको शनिबार राति मृत्यु भएको छ । दुलालको मृत्यु भएको घटनालाई प्रहरी शंकास्पद भएको भन्दै थप अनुसन्धान अघि बढाएको जनाएको छ । सुनसरीको इटहरी–१२ खनार स्थायी घर भएका दुलाल विराटनगर–१० मा डेरा गरी बसेको र सोही घरबाटै माँ पाथीभरा फर्मा नामबाट औषधिको थोक कारोबार गर्दै आएका थिए । डेरा लिएको घरमा दुलाल, उनकी श्रीमती मीना श्रेष्ठ (दुलाल) र ८ वर्षीय छोरासहित बस्दै आएका थिए ।