स्वास्थ्यकर्मीमाथि कुटपिट गर्नेविरुद्ध ‘गैर जमानती हिरासत कार्यान्वयन’ गर्नुपर्ने र भेरी अस्पतालमा भएको घटनाका दोषीलाई कडा कारबाही गर्नुपर्ने माग गर्दै नेपालगन्जमा दिनहुँ प्रर्दशन गरिएको छ।

दाङ, तुलसीपुर–११ का कोरोना संक्रमित ५२ वर्षीय डिल्ली रावतको उपचारका क्रममा मृत्यु भएपछि यही जेठ १३ गते राती मृतकका आफन्तले कोभिड आईसियु कक्ष तोडफोड गर्नुका साथै कुटपिट गरेको चिकित्सक र स्टाफ नर्सको आरोप छ।  

बाँकेमा गठित संघर्ष समितिको अगुवाईमा विगत तीन दिनदेखि हरेक मौन प्रर्दशन गरिएको हो। भेरी अस्पताल परिसरमा हरेक दिन अपरान्हतिर विभिन्न अस्पतालका चिकित्सक, स्टाफ नर्स लगायतले प्रर्दशन गर्दै आएका छन्। चिकित्सक, स्टाफ नर्स लगायतले मंगलबार पनि भेरी अस्पताल परिसरमा प्रर्दशन गरे।

विभिन्न प्लेकार्ड बोकेका स्वास्थ्यकर्मीले सरकारले हालै जारी गरेको ऐन कार्यान्वयन गर्नुपर्ने माग गरेका छन्।  

सरकारले हालै जारी गरेको ऐनमा ‘जेल विद आउथ विल’ अर्थात गैर जमानती हिरासतको ब्यवस्था गरिएकाले सो ब्यवस्था कार्यान्वयन गराउन र भेरी अस्पतालमा केही दिनअघि भएको घटनाका दोषीलाई कडा कारबाही गर्न दवाव स्वरुप मौन प्रर्दशन गरिएको नर्सिङ संघ बाँकेका अध्यक्ष लक्ष्मी केसीले बताइन्।

उक्त व्यवस्था कार्यान्वयन गर्न संघर्ष समितिले एक साताको अल्टिमेटम दिएको उनले सुनाइन्। ‘हामीले सरकारलाई ७ दिनको अल्टिमेटम दिएर मौन प्रर्दशन गरिरहेका छौं,’ केसीले भनिन्।  

छानविन प्रतिवेदन बुझाईयो

भेरी अस्पतालका स्वास्थ्यकर्मीमाथि भएको कुटपिट घटनाको छानविन गर्न बनेको समितिले आफ्नो प्रतिवेदन बुझाएको छ। भेरी अस्पतालमा भएको उक्त घटनाको छानविन गर्न सहायक प्रमुख जिल्ला अधिकारी शंकर विष्टको संयोजकत्वमा एक समिति बनाइएको थियो। उक्त समितिले प्रमुख जिल्ला अधिकारी शिवराम गेलाललाई ३० पेज लामो प्रतिवेदन बुझाएको हो। समितिले घटनाका प्रत्यक्षदर्शी, अस्पतालका मेडिकल सुपरिटेन्डेन्ट, डाक्टर, नर्स र आक्रमणमा संलग्न व्यक्ति लगायतलाई सोधपुछ गर्नुका साथै अस्पतालमा रहेको सिसी टिभीको फुटेजको आधारमा प्रतिवेदन तयार पारेको थियो।  

अस्पताल विकास समिति सदस्य एवम् छानविन समितिका सदस्य कृष्णप्रसाद श्रेष्ठले प्रतिवेदन प्रमुख जिल्ला अधिकारीलाई बुझाइएको जानकारी दिए। ‘समितिलाई तीनभित्र प्रतिवेदन बुझाउन समय दिइएको थियो, तर सबै पक्षसँग सोधपुछ गर्ने क्रममा समय अपुग भएपछि एकदिन थप समय मागेका थियौं,’ उनले भने । प्रमुख जिल्ला अधिकारी गेलालले प्रतिवेदनका आधारमा थप कारवाही प्रक्रिया अगाडि बढ्ने बताए ।  

घटनामा संलग्न रहेको आरोपमा प्रहरीले सोही दिन मृतकका भाइ मानबहादुर रावत, लोकबहादुर रावत र भरत रावतलाई पक्राउ गरेको थियो । घटनाको बिरोध र दोषीलाई कानुनी कारबाही गर्नुपर्ने माग गर्दै चिकित्सक, स्टाफ नर्स लगायतले आन्दोलन चर्काएपछि प्रहरीले पक्राउ परेका विरुद्ध ‘ज्यान मार्ने उद्योग’ र ‘आपराधिक उपद्रो’ अन्तर्गत मुद्दा दर्ता गरी कारबाही प्रक्रिया अगाडि बढाएको छ।