नेपाल कम्युनिष्ट पार्टीका संस्थापक पुष्पलाल श्रेष्ठको स्मृति दिवस पोखरामा पनि मनाइएको छ । नेपाल कम्युनिष्ट पार्टी (नेकपा) कास्की र पोखरा महानगर कमिटीको संयुक्त आयोजनामा ‘नेपालको कम्युनिष्ट आन्दोलनमा पुष्पलालको योगदान’ विषयक प्रवचन कार्यक्रम गरेर पोखरामा बुधबार पुष्पलाल स्मृति दिवस मनाइएको हो ।

कार्यक्रममा बोल्ने वक्ताहरुले पार्टी एकताको पक्षमा दृढतापूर्वक उभिन नेतृत्वलाई आग्रह गरेका छन् । पार्टी विभाजनले जनताको चाहनामाथि कुठाराघात गर्नुका साथै समग्र कम्युनिष्ट आन्दोलनलाई नै कमजोर बनाउने भन्दै उनीहरुले पार्टी एकतालाई अझ मजबुत पारेर जान सुझाव दिएका हुन् ।

कार्यक्रमका प्रमुख वक्ता नेकपा केन्द्रीय सदस्य तथा गण्डकी प्रदेश सह–इञ्चार्ज खगराज अधिकारीले पार्टी एक हुनुको विकल्प नभएको बताए । पार्टी विभाजनको कुनै गुञ्जायस छैन,‘उनले भने,‘नेतृत्वले कार्यशैली सुधारेर पार्टी एकताबद्ध बनाउनुको विकल्प छैन ।’ पार्टी अहिले विशिष्ट अवस्थामा रहेको भन्दै यसलाई जोगाई राख्नु नेतृत्वसँगै नेता, कार्यकर्ताको पनि कर्तव्य भएकोमा उनले जोड दिए ।

अधिकारीले भारतीय बिस्तारवादले नेपालको भूमि मिचेको दाबी गरे । कालापानी, लिपुलेक, लिम्पीयाधुरालगायतका क्षेत्र भारतले कब्जा गरेको छ,‘उनले भने,‘उक्त जमिन फिर्ता ल्याउनका लागि पनि हामी भारतसँग लड्नुपर्छ ।’ उनले भारतीय बिस्तारवादले भूमि मिचिरहँदा उत्तरतर्फको छिमेकी राष्ट्र चीनले भने एक ईञ्च पनि भूमि नमिचेको दाबी गरे ।

नेता अधिकारीले नेकपाले कांग्रेसलाई हेर्ने दृष्टिकोणसमेत स्पष्ट (क्लियर) गर्नुपर्ने बताए । कांग्रेस प्रतिक्रियावादी नै हो,‘उनले भने,‘हामीले कांग्रेसलाई हेर्ने दृष्टिकोण क्लियर गर्नुपर्छ र त्यहाँ रहेका श्रमजिवी, ईमान्दार, देशभक्तहरुलाई फिर्ता ल्याउनुपर्छ ।’ उनले नेकपाका केन्द्रीय सदस्यहरुको सम्पूर्ण सम्पती पार्टीकरण गर्नुपर्नेसमेत बताए । साम्यवादसम्म पुग्ने कार्यदिशा बनाएको नेकपाका नेताहरुले व्यक्तिगत सम्पती राख्न नहुने उनको भनाई थियो ।

नेकपा केन्द्रीय सदस्य तथा जिल्ला इञ्चार्ज राजकाजी गुरुङ (करण)ले जस्तोसुकै परिस्थितिमा पनि पार्टी एकता जोगाई राख्नुपर्नेमा जोड दिए । एजेण्डावाइज रुपमा नेताहरुको बिचार र दृष्टिकोण फरक हुनसक्छ,‘उनले भने,‘तर कम्युनिष्ट सिद्धान्तमा रहेर अहिलेको एकताको पक्षमा सम्पूर्ण नेता कार्यकर्ता दृढतापूर्वक उभिनुपर्छ ।’ उनले बिचारको बहस गर्दै जानुपर्ने तर एकता भने जोगाई राख्नु देश र जनताका लागि अपरिहार्य भएकोमा जोड दिए ।

नेकपा कास्कीका अध्यक्ष कृष्ण थापाको अध्यक्षतामा भएको कार्यक्रममा सचिव बखानसिंह तमु (आभाष)ले सञ्चालन गरेका थिए ।