मुख्यमन्त्री शंकर पोखरेलविरुद्ध अविश्वासको प्रस्ताव दर्ता हुने देखिएपछि लुम्बिनी प्रदेशमा सरकारले हतारमा संसद अधिवेशन अन्त्य गर्ने निर्णय गरेको छ । आज बसेको मन्त्रिपरिषद बैठकले अधिवेशन अन्त्य गर्न प्रदेश प्रमुख धर्मनाथ यादवलाई सिफारिस गर्ने निर्णय गरेको हो ।
सरकारको निर्णय अनुसार मंगलबार राति १२ बजेदेखि बैठक अन्त्य हुने छ । भोली दिउँसो भने सदन चल्ने छ । सोमबार पनि प्रदेशसभाको बैठक बसेको थियो । सरकारका प्रवक्ता तथा भौतिक पूर्वाधार मन्त्री बैजनाथ चौधरीले बिजनेशन नभएका कारणले प्रदेशसभाको अधिवेशन अन्त्य गर्नु गरेको बताए । ‘बजेट अधिवशेनको तयारीमा जुटनु पर्ने छ । यो अधिवेशनकालागि सरकारसंग बिजनेश पनि भएन’मन्त्री चौधरीले भने । सरकारका प्रवक्ता चौधरीले त्यसो भनेपनि मुख्यमन्त्रीविरुद्ध अविश्वासको प्रस्ताव ल्याउने तयारीमा तीन दल जुटेपछि सरकारले हतारमा अधिवेशन अन्त्यको निर्णय गरेको हो ।
मुख्यमन्त्री पोख्रेलविरुद्ध नेपाली कांग्रेस, नेकपा माओवादी केन्द्र र जनता समाजवादी पार्टीका सांसदहरुले हस्ताक्षर सुरु गरेका हुन्। नेपाली कांग्रेस र माओवादी केन्द्रका सांसदले हस्ताक्षर गरेपनि जसपामा भने आन्तरिक विवाद देखिएको श्रोतको दावी छ । प्रदेश सभामा जसपाका ६ जना सांसद छन् । ती मध्ये तीन जनाले हस्ताक्षर गरेपनि तीन जना सोमबारसम्म राजी नभएको बताइएको छ । तर तीनलाइ पनि मनाउने प्रयास भइरहेको जसपाकै एक जना नेताले बताए । जसपाको केन्द्रको विवादको असर प्रदेशमा देखिएको हो ।
८७ सदस्यीय प्रदेश सभामा नेकपा एमालेका ४१, माओवादी केन्द्रका २०, नेपाली कांग्रेसका १९, जसपाका ६ र राष्ट्रिय जनमोर्चाका १ सदस्य छन् । मुख्यमन्त्री पोखरेललाई सरकार जोगाउन ४४ मत चाहिन्छ । एमालेकै दुई प्रदेश सभा सदस्य माधव नेपाल समूहमा छन् । माओवादीका दुई जना सांसदले माओवादी दल परित्याग गरी ओली नेतृत्वको एमालेमा प्रवेश गरेका छन् । दल परिर्वतन गरेका रूपन्देहीका दधिराम न्यौपाने र गुल्मीका दिनेश पन्थीलाई नेकपा माओवादी केन्द्रको संसदीय दल र पार्टीले कारवाही गर्दै प्रदेश सभामा जानकारी दर्ता गरिसकेको छ । मंगलबार हुने प्रदेश सभा बैठकको कार्यसूचिमा त्यसलाई समावेश गरीएको बताइएको छ ।
एमाले प्रवेश गरेका सांसदलाई कारवाहीको सिफारिस गरेसंगै लुम्बिनी प्रदेश सरकार परिवर्तनको खेल सुरु भएको हो । सोमबारको बैठकले कर सम्वन्धी निर्णय पनि पारित गरेको छ । चैत १८ गते देखि सुरु भएको चालु अधिवेशनमा सोमबारसम्म जम्मा ४ वटा बैठक बस्यो ।
धरापमा परेका मुख्यमन्त्री भन्छन् : प्रतिपक्षले मिलेर गरौं भन्छ भने तयार छु
सरकार धरापमा परेपछि मुख्यमन्त्री पोख्रेलले सदनबाटै सरकारको बचाउ गरे । सिमित सत्ता स्वार्थबाट हुने हलचलबाट प्रदेश सरकार प्रभावित नहुने दावी गरे । संसद बैठकमा उनले माओवादी केन्द्र तर्फ संकेत गर्दै प्रदेश सरकारको ट्रयाक खलबल्याउने प्रयासमाथि बाटै भएको बताए ।
केन्द्रीय राजनीतिलाई गलत बाटोमा लैजाने प्रयासलाई रोक्न आफुले भूमिका खेलेकाले प्रदेश सरकारलाइ तारो बनाइएको बताए । प्रदेश सरकारकालाई अस्थिर बनाउने कोशिस किमार्थ सफल हुन नदिने पनि दावी गरे । मुख्यमन्त्री पोखरेलले प्रतिपक्षलाइ मिलेर काम गर्न आब्हान पनि गरे । ‘संघियता कार्यान्वयनका लागि प्रतिपक्षले मिलेर काम गरौं भने पनि तयार छु । अहिलेको मुख्यमन्त्री भन्दा बृहत्तर विकल्प दिन सक्छौं भनेर खुलस्त हुने हो भने पनि तयारै छौं’ मुख्यमन्त्री पोख्रेलले भने । माओवादी तर्फ संकेत गर्दै उनले भने ‘सत्तामा बसेर सत्तालाई नै कमजोर बनाउनु नसुहाउने खेल हो’ । लुकेर विकल्प खोज्नु भन्दा सत्तामा नबस्नेहरुका लागि छलफल गर्न सकिने उनले बताए ।
