आन्तरिक संघर्ष उत्कर्षमा पुगेको पुनर्जिवित नेकपा एमालेको माधव नेपाल र झलनाथ खनाल समूहले उदयपुरमा समानान्तर कमिटी गठन गरेको छ। वरिष्ठ नेता नेपालसहित उपाध्यक्ष भिम रावल, उपमहासचिव घनश्याम भुसाल र स्थायी समिति सदस्य सुरेन्द्र पाण्डेलाई साधारण सदस्यसमेत नरहनेगरी ६ महिनाका लागि निलम्बनको कारबाहीपछि चर्केको अन्तरसंघर्षको क्रममा देशव्यापी समानान्तर कमिटी निर्माणको क्रमलाई यो समूहले तीव्र्रता दिएको हो।
केही दिनअघि प्रधानमन्त्री तथा पार्टी अध्यक्ष केपी शर्मा ओलीले नेपालसहित अगुवा नेतालाई कारबाही गरेसँगै समानान्तर कमिटी गठन प्रक्रियाको अभियानलाई यो समूहले देशव्यापी बनाएको हो। उदयपुरमा जिल्ला अधिवेशनबाट निर्वाचित अध्यक्ष इश्वरमणि राउतकै अध्यक्षतामा समानान्तर कमिटी निर्माण भएको पार्टीले जनाएको छ।
पार्टीको २०५ सदस्यीय समानान्तर जिल्ला कमिटी अध्यक्ष राउत स्वयं छन्। उपाध्यक्षमा कैलाश बस्नेत, सचिव जयराम पंजियार थारु, उपसचिव गीता खड्का छन्। समानान्तर कमिटीलाई एमाले पोलिटब्यूरो सदस्य जगन्नाथ खतिवडाले भर्खरै सपथ गराएका छन्। अध्यक्ष राउत र केन्द्रीय सदस्य तथा जिल्ला इन्चार्ज बलदेव चौधरी आफ्नै समूहमा रहेकाले जिल्ला पार्टीदेखि सबै जनवर्गीय संगठनमा एमालेका समानान्तर कमिटी गठन गर्ने क्रम चलिरहेको पार्टीले जनाएको छ।
सपथ लिईसकेको जिल्ला नेतृत्वले आगामी ३ महिनाभित्र जिल्लाका ४ नगरपालिका र ४ गाउँपालिका गरी ८ वटै स्थानीयतह तथा ७५ वटै वडामा पार्टीको समानान्तर कमिटी गठन गरिसक्ने निर्णय गरेको छ। जिल्लाका धेरैजसो स्थानीयतह र वडा कमिटीहरु आफ्नै समूहका रहेकाले त्यसैलाई कायम राखिने छ भने ओली समूहले खोसेका केही ठाउँमा नयाँ कमिटी गठन गर्ने अध्यक्ष राउतले बताए।
पार्टीसँगै समूहले एमालेका सबै जनवर्गीय संगठनको पनि समानान्तर कमिटी गठन गर्ने क्रम चलिरहेको राउतले बताए। जस अनुसार युवा संघ, अनेरास्ववियु, अनेमसंघ गठन भईसकेको र मजदुर संगठन, जनसांस्कृतिक महासंघ, किसान महासंघ र जनसम्पर्कलगायत अन्य जनवर्गीय संगठनका समानान्तर कमिटीहरु पनि छिट्टै तल्लो तहसम्म गठन गरिसक्ने पार्टीले जनाएको छ।
