कर्णाली प्रदेशका मुख्यमन्त्री महेन्द्रबहादुर शाहीको राजीनामा माग गरिएको छ । भ्रष्टाचारका आरोपितलाई समर्थन गर्दै बचाउन खोजेको र भ्रष्टाचार गर्न सघाएको भन्दै कालीकोट निर्वाचन क्षेत्र प्रदेशसभा (ख) का जनताले मुख्यमन्त्री शाहीको राजीनामा माग गरेका हुन् ।
‘मुख्यमन्त्री शाही राजीनामा दे, भ्रष्टाचारी बचाउन पाइँदैन’ भन्दै यहाँ दैनिकजसो प्रदर्शन भइरहेको छ । मुख्यमन्त्री शाहीको राजीनामा माग्दै कालीकोटको पलाँता गाउँपालिकाका स्थानीयले नौ वटामध्ये आठवटा वडा कार्यालयमा तालाबन्दीसमेत गरेका छन् । गत वैशाख २७ गते कालीकोटको पलाँता गाउँपालिका अध्यक्ष लक्ष्मणबहादुर बमले सडक निर्माण योजनामा डोजर चलाउन खोजेपछि नेपाल कम्युनिस्ट पार्टी (नेकपा) का गाउँपालिका अध्यक्ष बिष्णुबहादुर रोकाया र वडा नम्बर १ का वडाध्यक्ष मानबहादुर भण्डारीले त्यसको प्रतिवाद गरेका थिए । डोजर जनताको मागअनुसार चलाउनु पर्ने, नभए सडकमा डोजर लगाउन नपाइने भन्दै नेकपा गाउँपालिका अध्यक्ष रोकाय र वडाध्यक्ष भण्डारी विरोधमा उत्रिएपछि झडपसमेत भएको थियो ।
घटना भएको भोलिपल्ट जुम्ला हुँदै कालीकोट पुगेका मुख्यमन्त्री शाहीले जिल्ला कार्य समितिका सदस्यहरूसँग छलफलसमेत गरेका थिए । उक्त छलफलमा मुख्यमन्त्री शाहीले गाउँपालिकाका अध्यक्ष बमको समर्थन गर्दै नेकपाका गाउँपालिका अध्यक्ष रोकाया र वडाध्यक्ष भण्डारीलाई पार्टीबाट निलम्बन गरेर छानबिन समिति बनाउने प्रस्ताव गरेका थिए । मुख्यमन्त्री शाहीले उपचारका लागि प्रदेश राजधानी सुर्खेत पुगेका अध्यक्ष बमसँग बसेर कुरा मिलाउने बचन दिएको बताइएको छ ।
उक्त घटनाको छानबिनका लागि जिल्ला कमिटी सचिवालय सदस्य खड्गराज सेजुवालको संयोजकत्वमा तीन सदस्यीय छानबिन समिति गठनसमेत भएको छ । गाउँपालिकाका अध्यक्ष रोकाया र वडाध्यक्ष भण्डारीलाई १५ दिन अर्थात् प्रतिवेदन नआउँदासम्म निलम्बन गर्ने सहमति भएको थियो । छानबिन समितिको प्रतिवेदनपछि पार्टीले आवश्यक निर्णय लिने भन्दै जिल्ला अध्यक्ष धनजीत शाही र सचिव नगिन्द्र शाहीले वैशाख ३० गते विज्ञप्ति निकालेका थिए ।
उक्त विज्ञप्तिमा छानबिन समितिलाई सघाउ पु¥याउन दुवै पक्षलाई निर्देशन गरिएको थियो । विवाद उत्पन्नपछि पार्टीको विवाद भएकाले कानुनीरूपमा नजाने र छानबिन समिति गठन गर्ने सहमति भएको सोही निर्वाचन क्षेत्रकी सहसंयोजक पार्वती सिंहले बताइन् । ‘कानुनीरूपमा नजाने सहमति भएपछि उहाँहरूलाई १५ दिनका लागि निलम्बन गरिएको थियो,’ उनले भनिन्, ‘पार्टीको निर्णयविपरीत समन्वय र सहकार्य नगरेर प्रहरीमा उजुरी दिने काम भयो ।’
पार्टीको निर्णय तल्याउँदै गाउँपालिका अध्यक्ष बमको जाहेरीपछि प्रहरीले दुवैजना (नेकपामा गाउँपालिका अध्यक्ष रोकाया र वडाध्यक्ष भण्डारी) लाई पक्राउ गरेकाले यहाँ मुख्यमन्त्रीको राजीनामा मागसम्मका कुरा आएको उनले बताइन् । उक्त विषय कानुनी प्रक्रियामा गएकाले मिलाउन समस्या भएको नेकपा कालीकोटका जिल्ला अध्यक्ष शाहीले बताए । 
