हिमाली जिल्ला मनाङको सबैभन्दा दुर्गम नार्पाभूमि गाउँपालिकाका मतपेटिका भोलि बिहान मात्र सदरमुकाम ल्याईने भएको छ।

मतदान सकिएको भएपनि मौसमी अवरोधका कारण हेलिकप्टर पुग्न नसक्दा विहीबार मतपेटिका सदरमुकाम चामे ल्याउन नसकिएको निर्वाचन आयोगले बताएको छ।

जिल्ला निर्वाचन अधिकारी जीवन कुँवरले नार्पाभूमि गाउँपालिकाका मतपेटिका शुक्रबार मात्र ल्याइने जानकारी दिए।

सदरमुकाम चामेबाट हिडेर दुईदिनमा पुगिने नार्पाभूमिका मतपेटिका ल्याउनका लागि हेलिकप्टर पठाउने भनिएपछि मौसमले साथ नदिएपछि शुक्रबार मात्र सदरमुकाम ल्याउने तयारी गरिएको उनले बताए। 

‘मौसम राम्रो भएन, बेलैमा हेलिकप्टर आएर जान सक्ने अवस्था पनि रहेन। त्यसैले शुक्रबार बिहान मात्र मतपेटिका सदरमुकाम चामे ल्याइनेछ,’ उनले भने। नार्पाभूमिमा पाँचवटा मतदान केन्द्र थिए। नार गाउँमा ३ वटा र फू गाउँमा २ वटा मतदान केन्द्र थिए। नार गाउँका १ देखि ३ वडाका मतपेटिका एकैठाउँ जम्मा गर्ने र फू गाउँका दुईवटा वडाका मतपेटिका एकैठाउँ संकलन गरेर हेलिकप्टर चामे झारिने उनले बताए।  

‘भौगोलिक रुपमा कठिन र चूनौतीपूर्ण मानिएको नार्पाभूमि बाहेक अन्यत्रका मतपेटिका भने गाडीबाटै ल्याउन सकिन्छ,’ उनले भने। हिमाली जिल्ला मनाङमा जम्मा ४०.५ प्रतिशत मत खसेको छ। जिल्लामा ७ हजार मतदाता थिए। चिसो छल्न सहर झरेका मतदाता घर नफर्केकोले कम मत खसेको अनुमान गरिएको जिल्ला निर्वाचन अधिकारी कुँवरले जानकारी दिए। 

चिसो छल्न सहर झरेका उच्च भेगका कतिपय मतदाता भोट खसाल्न भनेर गाउँ फर्केका थिएनन्। जाडो छल्न तल झरेका मतदातालाई घर फर्काउन हिउँ जमेर बाटो अवरुद्ध भएपछि सुरक्षाकर्मी लगाएर जमेको बरफ काटेर मतदानका कर्मचारी र मतदातालाई गाउँ फर्काइएको थियो।