नेपाल प्रेस काउन्सिलको आयोजना तथा नेपाल स्रष्टा समाजको संयोजनमा साहित्यिक पत्रकारितामा भाषिक एकता गोष्ठी सम्पन्न भएको छ। उक्त गोष्ठी नेपाल स्रष्टा समाजको सत्रौं स्थापना दिवसको उपलक्ष्यमा आयोजित सप्ताहव्यापी कार्यक्रमअन्तर्गत पाँचौ दिन भएकाे हो।

काउन्सिलको सभाकक्षमा सम्पन्न गोष्ठीमा उपत्यकाबाट प्रकाशित हुने साहित्यिक पत्रिका र अनलाइनका साहित्यिक पत्रकारहरूको उपस्थिति रहेको थियो।

उक्त गोष्ठीका मूलवत्ता भाषाविद् शरतचन्द्र वस्तीले भाषाको नयाँ आयाम प्रकट गर्ने मूल आधार साहित्य भएको बताए। उनले साहित्य सिर्जनामा प्रयोग हुने भाषा गलत र अशुद्ध भए त्यसले साहित्यलाई नै बिगार्ने बताए।

गोष्ठीका प्रमुख अतिथि वरिष्ठ साहित्यिक पत्रकार नगेन्द्रराज शर्माले सर्वमान्य भाषाकोशका लागि सरकारले नै मानक भाषाका लागि समिति बनाउनुपर्ने कुरामा जोड दिए। प्राडा गोविन्दराज भट्टराईले सीमापारिका नेपाली भाषी साहित्यकारहरू झन् अन्योलमा भएको बताए।