भन्सार जाँचपास भएको मितिले चार वर्षसम्म परीक्षण गर्न पाउने कानुनी व्यवस्था अव्यवहारिक भएको भन्दै घटाउन उद्योगी, व्यवसायीले माग गरेका छन्। विराटनगरमा आइतबार भन्सार विभागले आयोजना गरेको भन्सार जाँचपासपछि परीक्षणसम्बन्धी अन्तक्र्रियामा सहभागी उद्योगीहरूले चार वर्षबाट घटाएर एक वर्षभित्रै परीक्षण गर्नुपर्ने व्यवस्था गर्न माग गरे।  

कार्यक्रममा उद्योग संगठन मोरङका अध्यक्ष भीम घिमिरेले राज्यका सबै पक्षले स्वच्छ, पारदर्शी र इमान्दारीपूर्वक काम गरे राजस्वको लक्ष्य प्राप्त भई मुलुकले समृद्धि हासिल गर्ने बताए। आर्थिक र औद्योगिक क्रान्ति ल्याउन उद्योग, व्यवसाय फस्टाउने वातावरण तयार गर्नुपर्ने भन्दै उनले थपे, ‘आर्थिक प्रशासनलाई छिटो, छरितो बनाउँदै प्रक्रिया पुगेका कन्साइमेन्टको जा“चपासमा ढिलाइ गर्न हुँदैन। निजी क्षेत्रलाई देशको आर्थिक एवं औद्योगिक समृद्धिको सहयात्रीको रूपमा लिई एकअर्काको विश्वासको वातावरण तयार गर्नुपर्छ।’  

‘भन्सार जाँचपास भएको मितिले चार वर्षसम्म परीक्षण गर्न पाउने कानुनी व्यवस्थालाई व्यवहारिक बनाउन बढीमा १एक वर्षको समय सीमा कायम गर्नुपर्छ,’ मोरङ व्यापार संघका कार्यबाहक अध्यक्ष नविन रिजालले भने, ‘मुद्दामा गएका पैठारीलाई छिट्टो छिनोफानो गर्न जरुरी छ। न्यून बिजकीकरणको शंका लागेमा पैठारी भएका मालसामानको बिजक मूल्यमा १० प्रतिशत मूल्य अभिवृद्धि गरी भन्सार विभागले नै खरिद गर्ने व्यवस्था कार्यान्वयन गर्नुपर्छ।’

भन्सार विभागका महानिर्देशक सुमन दाहालले भन्सार विभागले निर्दिष्ट नीति, नियमको पालना गराउँदै आयात–निर्यात व्यापार सहजीकरण गर्दै आएको बताए। उद्योगी, व्यवसायीलाई भन्सार कार्यालयसँग सम्बन्धित समस्या स्थानीय स्तरमै सुल्झाउँदै नीतिगत समस्या आएमा समाधानका लागि विभाग तयार रहेको बताए।  

त्यसैगरी, प्रमुख भन्सार परीक्षण प्रशासक विष्णुराज ढकालले उद्योगी, व्यवसायीलाई हार्मोनिक सिस्टम कोडको मर्म अनुसार कानुन परिपालना गर्नु, गराउनु भन्सारको काम भएको बताए। उद्योग संगठन मोरङका पूर्वअध्यक्ष सुशील धनावतले उद्योगी, व्यवसायीलाई मात्र दोष देखाएर हरेक कुरामा जरिवाना लाउन नहुने भन्दै भन्सार जाँचपास भएको मितिले बढीमा एक वर्षसम्म परीक्षण गर्न पाउने व्यवस्था कायम गर्नुपर्नेमा जोड दिए।