वीरेन्द्रनगर नगरपालिका–३ स्थित स्काई ड्रिम ईन्टरपेनर्स प्रा.लि र यसमार्फत आबद्ध ग्लोवल ओरियन्स नेपाल प्रा.लि ले बेरोजगार युवायुवतीलाई विदेश रोजगारी, सीपमूलक तालिम, राम्रो तलब सुविधा र आवासको प्रलोभन देखाउँदै करोडौं रुपैयाँ ठगी गरेको आरोपमा ८ जना पक्राउ परेका छन् । सुर्खेत प्रहरीले पीडितहरूको जाहेरीको आधारमा ठगी धन्दा गर्ने स्काई ड्रिम ईन्टरपेनर्स प्रा.लि र ग्लोवल ओरियन्स नेपाल प्रा.लिमा आवद्ध ८ जनालाई विभिन्न ठाउँबाट पक्राउ गरेको हो ।  

देशका विभिन्न जिल्लाबाट आएका बेरोजगार युवायुवतीलाई वार्षिक बीस हजार तिरेर खाना, बस्न र कोठा दिने भन्दै कम्पनीमा राखी नेटवर्किङ मार्केटिङ मार्फत काम लगाइएको थियो । कामको नाममा नयाँ सदस्य भित्र्याउन दबाब दिइने र हरेक व्यक्तिबाट पचास हजारदेखि दुई लाख साठी हजारसम्म असुली गर्ने गरिएको पीडितहरुले बताएका छन् ।

यसरी झुक्याएर स्काई ड्रिम ईन्टरपेनर्स प्रा.लि र ग्लोवल ओरियन्स नेपाल प्रा.लिले करोडौं रुपैयाँ असुल गरेको पाइएको छ ।  

केही सञ्चालक तथा कर्मचारीहरुलाई प्रहरीले खोजतलास तथा अनुसन्धान गरिरहेको जिल्ला प्रहरी कार्यालय सुर्खेतका प्रवक्ता मोहनजंह बुट थापाले जानकारी दिए ।  

पक्राउ पर्नेमा नरेश बोहरा (जिल्ला डोटी, सायल गाउँपालिका वडा नम्बर २), कृष्ण धामी (जिल्ला दार्चुला, महाकाली गाउँपालिका वडा नम्बर ४), कमल शाही (जिल्ला अछाम, कमल बजार नगरपालिका वडा नम्बर ६), रविन्द्र शाही (जिल्ला अछाम, कमल बजार नगरपालिका वडा नम्बर ६), मनिषा सिंह (जिल्ला कञ्चनपुर, महाकाली नगरपालिका वडा नम्बर २), निर्मला धामी (जिल्ला कञ्चनपुर, बेल्डाँडी गाउँपालिका वडा नम्बर १), सुनिता साउद (जिल्ला बैतडी, सिगास गाउँपालिका वडा नम्बर ६) र कमला चिमाला (जिल्ला डोटी, बडिकेदार गाउँपालिका वडा नम्बर ४) लाई प्रहरीले पक्राउ गरेको छ ।  

पीडितहरूका अनुसार, ठगीमा संलग्न भनिएका व्यक्तिहरूलाई प्रचलित कानुनअनुसार कडा कारबाहीको माग गरिएको छ । यस विषयमा अनुसन्धान भइरहेको प्रहरीले जनाएको छ ।