ललितपुरको कुपण्डोलस्थित समिट होटल तथा अपार्टमेन्ट निर्माण परियोजना र ग्रिनविच होटलबीचको विवादले क्षतिपूर्तिसँगै सरकारी नीति निर्माण र पारदर्शितामाथि प्रश्न उठाएको छ।

२०७९ चैतमा समिट होटलको जग खन्ने क्रममा आसपासका संरचनामा क्षति पुगेपछि ग्रिनविच होटल तीन वर्षदेखि बन्द छ। ग्रिनविचले भवन मर्मतका लागि ३१ करोड रुपैयाँ क्षतिपूर्ति आवश्यक रहेको दाबी गरेको छ भने समिट पक्षले ९ करोड ६६ लाख रुपैयाँ क्षतिपूर्ति दिइसकेको जनाएको छ।

विवाद कायम रहँदै २०८० पुसमा निर्माण पुनः सुरु भएपछि नक्सा पास प्रक्रिया र कानुनी मापदण्डबारे थप प्रश्न उठेका छन्। समिट परियोजना २०७९ साउनदेखि निर्माणमा गए पनि आधिकारिक नक्सा २०८२ वैशाखमा मात्रै स्वीकृत भएको देखिन्छ।

यसबीच परियोजना सुरु हुनुअघि सरकारले भवन निर्माण मापदण्ड संशोधन गर्दै अग्ला भवनका लागि आवश्यक सेटब्याक र खुला क्षेत्रसम्बन्धी व्यवस्था खुकुलो बनाएको थियो। यही संशोधनले समिट परियोजनालाई प्रत्यक्ष लाभ पुगेको भन्दै नीति परिवर्तन कुनै विशेष परियोजनालाई लक्षित थियो कि भन्ने विषय सार्वजनिक बहसमा आएको छ।

समिट होटलका अध्यक्ष राहुल चौधरी उद्योगपति विनोद चौधरीका छोरा हुन्। विवादमा राजनीतिक पहुँच र नीतिगत प्रभावको आशंका पनि उठिरहेको छ। यद्यपि सम्बन्धित पक्षहरूले आफूहरूले कानुनी प्रक्रियाअनुसार नै काम गरेको दाबी गरेका छन्।