नेपालमा केही हुँदैन भन्ने भाष्यलाई चिर्न सहयोग गर्ने उद्देश्यका साथ नेपाल रिपब्लिक मिडियाले आयोजना गरेको ‘म नागरिक, म बनाउँछु नेपाल’ क्रिएटर च्याम्पियन २०२५ सोमबार सकिएको छ। 

नेपालमै केही गर्न सकिन्छ भन्ने दरिलो भावना युवामा अभिवृद्धि गर्ने उद्देश्यका साथ सातवटै प्रदेशका विभिन्न ठाउँमा भएको अभियानमा प्रतिस्पर्धीमध्ये उत्कृष्ट क्रिएटरहरूलाई लोकतान्त्रिक गणतन्त्र नेपालका पहिलो राष्ट्रपति डा. रामवरण यादवले आकर्षक नगद पुरस्कार वितरण गरे।

भक्तपुरको दरबार क्षेत्रको खुला ठाउँमा भएको कार्यक्रममा उत्कृष्ट तीनवटा र पिपुल चोइसको एउटा गरी चारवटा उत्कृष्ट क्रिएटरहरूलाई नगद पुरस्कार वितरण गरिएको हो। कार्यक्रममा पूर्वराष्ट्रपति डा. यादवले युवाका लागि स्वदेशमै प्रशस्त सम्भावना रहेको बताए। उनले नेपालमा केही नभएको भन्ने भाष्य गलत भएको भन्दै देश धेरै अगाडि बढेको चर्चा गरे। ‘नेपालमा हिजो हामी दबिएर बस्नुपर्थ्यो, आज सारा नेपाली समान भएको छ, यो नै हाम्रो ठुलो उपलब्धि हो,’ उनले भने।

उनले नेपाल लोकतान्त्रिक लोकमार्गलाई अगाडि बढाएर गए देशमा धेरै विकास हुने पनि बताए। लोकतन्त्रलाई आधार बनाई नेपालमै केही गरे सम्भव नहुने कुनै विषय नभएको उनको विश्लेषण थियो। उनले भने, ‘हिजो नेपालमा कालोपत्रे बाटो भेट्टाउन गाह्रो थियो, आज कालोपत्रे सडक नभएको ठाउँ नै छैन। नेपालमा पर्यटन, कृषि, प्रविधिलगायत धेरै कुराले फड्को मार्ने अवस्था रहेकाले युवा जनशक्तिलाई अवसरै अवसर रहेको उनको भनाइ थियो। चारैतिर लथालिंग स्थितिमा रहेको अवस्थामा देशलाई बनाउने जिम्मा युवाहरूको हातमा रहेको डा. यादवले बताए।

झन्डै एक सयजना क्रिएटरहरूमध्ये उत्कृष्ट पाँच जनाको भिडियो कार्यक्रममा देखाइएको थियो। त्यसपछि उत्कृष्ट क्रिएटरहरूको घोषणा गरिएको थियो, जसअनुसार करण सिंहले बनाएको करण सिंह ओडा फाउन्डेसनको भिडियो पहिलो घोषित भयो। पहिलो घोषित भिडियोले नगद एक लाख २५ हजार प्राप्त गर्‍यो। त्यस्तै सजिल बस्नेतले बनाएको टीएनएल प्रोडक्सनको भिडियो दोस्रो घोषित भई एक लाख नगद पुरस्कार प्राप्त गर्‍यो। साथै शिवानी मानन्धरले बनाएको ट्रेल बिल्डर्सको भिडियो तेस्रो भई ७५ हजार नगद पुरस्कार प्राप्त गर्न सफल भयो।

साथसाथै सबैभन्दा बढी सेयर, कमेन्ट, भ्युअर्स भएको निखिल तण्डुकार (युनिग्लोब कलेज)को भिडियो पिपुल्स चोइस भिडियोमा पर्न सफल भई एक लाख नगद पुरस्कार प्राप्त गर्न सफल भयो। उत्कृष्ट सबैलाई पूर्व राष्ट्रपति यादवले चेक हस्तान्तरण गरेका थिए। कार्यक्रममा नेपाल रिपब्लिक मिडियाकी प्रबन्ध निर्देशक समृद्धि ज्ञवालीले कार्यक्रमको उद्देश्यबारे प्रस्ट पार्दै देश बनाउने जिम्मेवारी युवाको काँधमा रहेको बताइन्। ‘यो देश तपाईं–हामी युवाले नै बनाउने हो,’ उनले भनिन्, ‘हामी युवाले नै देश नबनाए कसले बनाउने?’

उनले आफू १३ वर्षअघि स्नातकोत्तर तह सिध्याएर नेपालमै केही गर्नुपर्छ भनेर फर्किएको सुनाइन्। नेपालमा पनि सीप र क्षमताअनुसार रोजगारी पाउने प्रशस्त सम्भावना रहेको प्रबन्ध निर्देशक ज्ञवालीले बताइन्। आजका युवाले कसैलाई गाली गरेर समय खेर फाल्नुभन्दा पनि आफूले केही गरेर देखाउनुपर्ने धारणा उनले राखिन्। ‘जलवायु परिवर्तनको असर एकदमै खतरनाक तरिकाले अगाडि बढिरहेको छ,’ उनले भनिन्, ‘जलवायु विपद्का कारण नेपाल अप्ठ्यारो अवस्थामा छ।’ 

नेपालमै पर्यटन, कृषि, प्रविधिको विकास हुँदै गएकाले सम्भावना प्रशस्त मात्रामा रहेको उनले बताइन्। कार्यक्रममा धन्यवाद ज्ञापन गर्दै नागरिक दैनिकका प्रधानसम्पादक गुणराज लुइँटेलले कार्यक्रमले नेपाली युवामा स्वदेशमै बस्ने प्रेरणा मिल्ने विश्वास व्यक्त गरे। कार्यक्रमका सहभागी अन्य वक्ताहरूले ‘म नागरिक, म बनाउँछु नेपाल’ भन्ने सोच सबैमा जाग्नुपर्नेमा जोड दिए। भक्तपुर नगरपालिकाका प्रमुख सुनिल प्रजापति, ‘म नागरिक, म बनाउँछु नेपाल’ का मेन्टरमध्येका एक एमएडब्लुका चेयरम्यान विष्णुकुमार अग्रवाललगयातले जे सकिन्छ स्वदेशमै गर्नुपर्नेमा जोड दिए। कार्यक्रममा नेपाल रिपब्लिक मिडिया लिमिटेडका अध्यक्ष विनोदराज ज्ञवालीले सहभागीलाई मायाको चिनो वितरण गरेका थिए।

कार्यक्रममा उत्कृष्ट पाँचवटै क्रिएटरहरूले ‘म नागरिक, म बनाउँछु नेपाल’ कार्यक्रम प्रभावकारी रहेको भन्दै आफूहरू पनि देश बनाउने अभियानमा लाग्ने प्रतिबद्धता प्यानल डिस्कसनको क्रममा व्यक्त गरेका थिए। नेपाल रिपब्लिक मिडियाले सञ्चालन गरेको ‘म नागरिक, म बनाउँछु नेपाल’ क्रिएटर च्याम्पियन राष्ट्र र नागरिकका लागि महत्वपूर्ण अभियान भएको उनीहरूले बताए।