लोकतान्त्रिक समाजवादी पार्टी (लोसपा) ले स्थानीय तहको निर्वाचनमा सम्भव भएसम्म ठूला कुनै एक दलसँग गठबन्धन गरी जनता समाजवादी पार्टी (जसपा) को भन्दा आफ्नो पकड बलियो बनाउने रणनीति बनाएको छ।

नौ महिनाअघि जसपाबाट अलग भएर गठन भएको लोसपाका नेताहरूले अहिले नेपाली कांग्रेस र नेकपा एमालेसँग बराबरी सम्बन्ध राख्दै गठबन्धनका लागि वार्ता र छलफल अघि बढाएका छन्। कांग्रेस र एमालेमध्ये एक दलसँग गठबन्धन गरेर अघि बढ्ने लोसपाको तयारी छ।

दुई ठूला दलमध्ये एकसँग गठबन्धन सम्भव नभए अन्यसँग पनि तालमेल गर्न सकिने लोसपाका नेताहरूले बताएका छन्। पछिल्लो समय लोसपाका शीर्ष नेताहरू कांग्रेसका सभापति एवं प्रधानमन्त्री शेरबहादुर देउवासँग निरन्तर संवाद र छलफलमा छन्।

पछिल्लो डेढ सातामा लोसपा अध्यक्ष महन्थ ठाकुरले प्रधानमन्त्री देउवासँग तीनपटक कुराकानी गरेका छन्। यसैगरी लोसपाका नेताहरू एमाले अध्यक्ष केपी शर्मा ओलीसँग पनि निरन्तर सम्पर्क र भेटघाटमा छन्। लोसपा कार्यकारिणी समितिका सदस्य तथा प्रतिनिधिसभा सदस्य विमल श्रीवास्तवले चुनावमा एमाले र कांग्रेसमध्ये एकसँग गठबन्धन गर्ने पार्टीको नीति भएको प्रस्ट पारे।

‘त्यसका लागि शीर्ष नेताहरूले एमाले र कांग्रेसका नेतासँग अनौपचारिक संवाद र छलफल गरिरहनुभएको छ,’ श्रीवास्तवले भने, ‘तर पनि गठबन्धन कांग्रेसभन्दा एमालेसँग हुन्छ कि जस्तो छ।’ जसपासँग भने गठबन्धन हुने सम्भावना लोसपाका नेताहरूले देखेका छैनन्। पार्टी विभाजनपछि जसपा र लोसपाबीच अहिले पानी बाराबारको अवस्था छ।

जसपा सरकारमा रहेकाले सरकारबाहिर रहेको एमालेसँग गठबन्धनको सम्भावना हुन सक्ने आकलन लोसपाका नेताहरूको छ। ‘सत्तारूढ दल भएको हैसियतले जसपा र नेपाली कांग्रेसबीच गठबन्धन भयो भने हामी बाध्य भएर एमालेसँग सहकार्य गर्नेछौं,’ लोसपाका एक नेताले भने।

लोसपा कार्यकारिणी समिति सदस्य केशव झाले चुनावमा जसपासँग गठबन्धनको सम्भावना निकै कम भएको बताए। ‘राजनीतिमा असम्भव त छैन तर पनि यो स्थानीय निर्वाचनमा जसपासँग गठबन्धनको सम्भावना त्यति छैन,’ झाले भने।

प्रधानमन्त्री देउवाले अघिल्लो साता लोसपाका शीर्ष नेताहरूसँगको भेटमा सुरुमै एमालेसँग सहकार्य गर्न लागेको विषयमा चासो राखेका थिए। ‘भेटमा प्रधानमन्त्रीज्यूले सुरुमै तपाईंहरूले एमालेसँग गठबन्धन गर्न लाग्नुभएको हो भनी जिज्ञासा राख्नुभयो। हामीले यस विषयमा छलफल भएको छैन भन्यौ,’ नेता झाले भने, ‘हाम्रा माग सम्बोधन भए कांग्रेससँग पनि सहकार्य गर्न सक्छौं भन्यौं।’

त्यो भेटमा प्रधानमन्त्री देउवाले लोसपालाई सरकारमा समेत सहकार्य गर्न प्रस्ताव गरेका थिए। त्यस प्रस्तावमा लोसपाका नेताले सकारात्मक जवाफ दिएका थिए। स्रोतका अनुसार प्रधानमन्त्री देउवाले लोसपा सरकारमा सहभागी भए दुईवटा मन्त्रालय र एक राज्यमन्त्री दिन तयार भएको बताएका थिए।लोसपालाई सरकारमा ल्याउन खोजेको चाल पाएपछि जसपा अध्यक्ष उपेन्द्र यादवले प्रधानमन्त्रीलाई भेटेर आपत्ति प्रकट गरेका थिए।

स्रोतका अनुसार यादवले लोसपा सरकारमा सहभागी भए आफ्नो पार्र्टी बाहिरिने चेतावनी दिएका थिए। त्यसपछि लोसपालाई सरकारमा ल्याउने योजनाबाट प्रधानमन्त्री पछि हटेको स्रोतको दाबी छ। लोसपाले स्थानीय तहको चुनावकेन्द्रित विभिन्न कार्यक्रम सुरु गरेको छ।

उसले चैत ८ गते जनकपुरमा, १० गते वीरगन्जमा, १२ गते भैरहवामा र १४ गते नेपालगन्जमा कार्यकर्ता प्रशिक्षण गर्दैछ। अहिले चुनावलक्षित कार्यक्रम सुरु गरेको झाले बताए। उनले भने, ‘गठबन्धन नभए पनि एक्लै चुनाव जान सक्ने गरी तयारी गर्दैछौं।’

जसपामा विवाद बढ्दै गएपछि गत भदौ १ गते असन्तुष्ट नेताहरूले लोसपा दर्ता गर्न निर्वाचन आयोगमा निवेदन दिएका थिए। भदौ ७ गते आयोगले लोसपालाई दलका रूपमा मान्यता दिएको थियो।