तराई मधेस केन्द्रित तीन दल जनमत पार्टी, जनता प्रगतिशील पार्टी तथा तराई मधेस लोकतान्त्रिक पार्टीले कार्यगत एकता गर्ने भएका छन्।

आइतबार जनमतका अध्यक्ष सिके राउत, जप्रपाका अध्यक्ष हृदेयश त्रिपाठी तथा तमलोपाका अध्यक्ष वृषेशचन्द्र लालले विज्ञप्तिमा संयुक्त हस्ताक्षर गरी सहकार्य गर्ने सहमति गरेका हुन्।

विज्ञप्तिमा उनीहरूले  नेपालको संविधानको रक्षार्थ यसमा समसामयिक संशोधन गर्दै संघीय लोकतान्त्रिक गणतन्त्रको सुदृढीकरण गर्न, तराई मधेसका साथै सम्पूर्ण देशमा सुशासन र समृद्धिको लक्ष्य प्राप्ति गर्न, विद्यमान सबै प्रकारका विभेदहरू अन्त्य गर्न, उत्पादनमुखी अर्थतन्त्र स्थापित गरी राष्ट्रिय पुँजी निर्माण गर्नको लागि सहकार्य गर्न सहमत भएको जनाएका छन्।

यसैगरी उनीहरूले देशको कृषि उत्पादनमा वृद्धि तथा किसानको हितमा क्रियाशील रहन, उद्योग–धन्धा तथा कलकारखानाहरू स्थापित गर्दै रोजगारी सिर्जना गर्न, गुणस्तरीय तथा सर्वसुलभ शिक्षा, स्वास्थ्य तथा सामाजिक सुरक्षा सुनिश्चित गर्न सहमत भएका जनाएका छन्। यस अभियानमा अन्य दलहरूलाई सहभागी हुन उनीहरूले आग्रह गरेका छन्। यतिबेला यी तीन दल सरकार बाहिर छन्।