गम्भीर अवस्थाकी एक गर्भवती महिलालाई धौलागिरी अञ्चल अस्पताल बागलुङले पोखरा रिफर गरेपछि बाटोबाटै फर्किएर बेनी अस्पताल म्याग्दीमा सफल उपचार भएको छ । बागलुङ नगरपालिका–८, सिगानाकी २१ वर्षीया आरती मल्लको बेनी अस्पतालमा आकस्मिक शल्यक्रियामार्फत उपचार गरिएको हो । 

सुत्केरी बेथा लागेपछि सोमबार राती १२ बजे अञ्चल अस्पताल बागलुङमा पुगेकी उनको त्यहाँ सामान्य चेकजाँच समेत नगरी सिधै पोखरा रिफर गरिएको थियो । त्यसपछि ट्याक्सीमार्फत पोखरा जाने क्रममा पवर्तको मालढुङ्गा नजिकै नयाँपुल पुग्दा सडक माथिबाट आएको पहिरोले सडक अवरुद्ध भएको अवस्थामा म्याग्दी आएर बेनी अस्पतालमा उपचार गरिएको उनको आफन्त प्रतिभा शाहीले बताइन् ।

‘बागलुङको भन्दा राम्रो सेवा बेनीमा रहेछ,‘सेवाबाट निकै उत्साहित भयौं’ शाहीले भनिन् । म्याग्दीबाट बागलुङमा उपचार गर्न जाने गरेको अवस्थामा पछिल्लो केही वर्षयता बेनी अस्पतालमा अनुभवी चिकित्सक र बिरामीमैत्री वातावरणका कारण उपचार सम्भव देखेर मध्यरातमा फर्किएको उनले बताइन् । ‘बुहारीलाई व्यथा लागेर बागलुङ अस्पतालमा लगेपनि स्टाफनर्सले यहाँ डाक्टर नभएकाले पोखरा लैजानु भने,‘आफ्नै जिल्लामा सेवा लिन नपाएपछि मध्यरातमा छिमेकी जिल्लामा पुगेर सेवा लिइयो’ उनले भनिन् । धौलागिरी अञ्चल अस्पतालका स्वास्थ्यकर्मीले उपचार गर्न नसकिने बताउँदै पोखरा लैजानु भनेकाले जाने क्रममा बाटो बन्द भएपछि उपचारका लागि बेनी आउने जानकारी पाएपछि चिकित्सकसहितको टोली तयारी अवस्थामा रहेको थियो । अञ्चल अस्पताल भएर पनि उपचार गनुको सट्टा अन्यत्र रिफर गर्दा बिरामी र आफन्तले सास्ती बेहोर्नु परेकोमा गुनासो सुत्केरीका आफन्तले गरेका छन् ।

मध्यरातमा उपचारका लागि बेनी अस्पताल आएकी गर्भवती महिलाको शल्यक्रियामार्फत उपचार गरी बच्चा निकालिए पनि दुवैको अवस्था सामान्य रहेको अस्पताल ब्यवस्थापन समितिका अध्यक्ष बेलबहादुर कटुवालले बताए । ‘सेवाका लागि छिमेकी जिल्लाबाट आउने क्रम जारी छ,‘मध्यरातमा एउटा गर्भवती महिलाको ज्यान जोगियो, परिवारका खुसीयाली छायो’ कटुवालले भने । उनका अनुसार अस्पतालको स्पेशल केयर युनिटमा राखेर स्वास्थ्यकर्मीको प्रत्यक्ष निगराीमा उपचार भैरहेको छ । व्यथा लागेर सुत्केरी हुनका लागि बेनी अस्पतालमा आएकी ती महिलाको गर्भबाट बच्चाको खुट्टा निस्किसकेको अवस्थामा आएपछि तत्काल शल्यक्रियाको प्रक्रियामा गएको डा.सागर लामिछानेले बताए । ‘त्यस्तो अवस्थामा तत्कालै सफल उपचार गरियो,‘यो जटिल अवस्था थियो,‘बच्चाको खुट्टा बाहिर निस्किएको थियो’ डा. लामिछानेले भने । आकस्मिक शल्यक्रियामार्फत उपचार गरेपछि उनको छोरा जन्मिएको छ भने डेलिभरी हुन एक महिनाको समय अर्थात ३५ हप्ताको अवधिमै बच्चा जन्मिएको चिकित्सकको भनाई छ ।

उनको अहिले जन्मिएको बच्चा पहिलो हो । डा. लामिछानेसहित सिनियर अनमी रुविना थापा, एनेस्थेसिया असिस्टेन्ट सुनिता महर्जन, स्टाफनर्स सुमित्रा शाही, झरना श्रेष्ठ र हेल्पर निरा गर्बुजाको टिमले गर्भवती महिलाको आकस्मिक शल्यक्रियामार्फत सफल उपचार गरेको थियो ।  

यसअघि पनि बागलुङ जिल्लाकै एक महिलाको अञ्चल अस्पतालमा उपचार हुन नसकेपछि पोखरा जाने क्रममा कास्कीको नयाँपुलमा पुग्दा पहिरोले सडक अवरुद्ध बनाएको थियो । त्यसपछि पर्वत अस्पतालमा समेत उपचार हुन नसकेपछि उनको पनि बेनी अस्पतालमा आएर आकस्मिक शल्यक्रियमार्फत उपचार गरिएको थियो । अञ्चल अस्पताल भएर पनि बागलुङमा सुत्केरी हुनका लागि आवश्यक सेवासुविधा नहुनु निकै दुःखद पक्ष भएको बिरामीको भनाइ छ ।

बेनी अस्पतालमा निक साईमन इस्टिच्युटको आर्थिक तथा प्राविधिक सहयोगले पछिल्लो समय म्याग्दी जिल्ला बाहिरबाट समेत प्रसुती सेवा लिन आउनेको चाप बढेको छ । अस्पतालका क्लिनिकल कोअर्डिनेटर डा. नवराज बस्ताकोटीले चिकित्सा क्षेत्रमै दुर्लभ र जटिल मानिएका अप्रेसन समेत गर्ने गरेकाले पोखरा रिफर गरिएका पर्वत र बागलुङ अस्पतालका बिरामी समेत बेनीमा आउने गरेका छन् । चिकित्सा क्षेत्रमा ठूला र आकस्मिक रुपमै गर्नुपर्ने शल्यक्रियाभित्र पर्ने एक्टोपिक प्रेग्नेन्सी जस्ता जटिल सेवामा समेत चिकित्सकले सफलता प्राप्त गरेका छन् । रिफर गर्ने नमिल्ने अवस्थाकामा आएका जटिल सेवा समेत दिने गरिएको छ ।