रौतहटमा कोरोना संक्रमितको संख्या ह्वात्तै बढेको छ । मंगलबार एकै दिन २२ जना संक्रमित थपिएपछि जिल्लामा संक्रमितको संख्या ६९ पुगेको जिल्ला प्रशासन कार्यालय रौतहटले जनाएको छ ।

मंगलबार थपिएका २२ जनामध्ये गौर नगरपालिकाका ८ जना, देवाही गोनाही नगरपालिकाका १२ जना, राजदेवी र गरुडा नगरपालिकाका एक एक जना रहेका छन् । थपिएका संक्रमित सबै क्वारेन्टिनमा रहेका छन् । संक्रमित सबैको गत जेठ ६ गते स्वाब संकलन गरिएको थियो । सबैको स्वास्थ्य अवस्था सामान्य रहेको प्रमुख जिल्ला अधिकारी वासुदेव घिमिरेले जानकारी गराएका छन् ।

यसअघि गत आइतबार मात्र रौतहटमा २६ जना संक्रमित थपिएका थिए । थपिएका संक्रमित जति सबै भारतको मुम्बई र दिल्लीबाट आएको पाइएको छ । सोमबार थपिएका २६ संक्रमित मध्ये २५ जना महाराष्ट्र र एकजना दिल्लीबाट एकै दिन नेपालमा प्रवेश गरेको पाइएको छ । संक्रमित सबै गत जेठ २ मा मठिया नाकाबाट प्रवेश गरेको पाइएको छ ।  

आइतबार थपिएका संक्रमितमध्ये राजपुर नगरपालिकाका २४ र ईशनाथ नगरपालिकाका दुई जना रहेका छन् । राजपुर नगरपालिकामा सोमबार पुष्टि भएका संक्रमितहरू भारतको महाराष्ट्रबाट गत जेठ २ गते नेपाल छिरेका हुन् । महाराष्ट्रको भिभिन्डीमा कपडा उद्योगमा काम गर्ने गरेका मजदुरहरू महाराष्ट्रबाटै ट्रकमा भारतको छिमेकी चैनपुरसम्म आएका थिए ।  

महाराष्ट्रबाट ९६ जना मजदुरहरू सिमानासम्म आइपुगेका थिए । चैनपुरबाट पैदलै मठिया नाकासम्म आएका सबै जनालाई प्रहरीले बलुवास्थित मदरसामा बनाइएको क्वारेन्टिनमा पुर्याइएको थियो । महाराष्ट्रको भिभिन्डीबाट आएका सबै जनाको स्वाब संकलन गरी पठाइएकोमा २४ जनामा कोरोना संक्रमण पुष्टि भएको छ भने बाँकीको रिपोर्ट आउने क्रममा रहेको छ ।

ईशनाथ नगरपालिकाका दुईमध्ये एकजना भारतको दिल्लीबाट र अर्का एकजना मुम्बईबाट आएको पाइएको छ । दिल्लीबाट आएका युवक एक्लै जेठ २ मा मठिया नाकामा आइपुगेका थिए । संक्रमित देखिएका अर्का एकजनासहित मुम्बईबाट २२ जना मुम्बईबाट मठिया नाकासम्म आएका थिए । मठिया नाकाबाट प्रहरीको सहयोगमा ईशनाथ नगरपालिकाको औरैयामा स्थित क्वारेन्टिनमा लगेर राखिएको थियो । क्वारेन्टिनमा लैजान सहयोग गर्ने सुरक्षाकर्मी तथा स्वास्थ्यकर्मीसहित २७ जनाको गत जेठ ६ मा स्वाब संकलन गरी चेकजाँचको लागि पठाइएकोमा दुई जनामात्र संक्रमण देखिएको छ । स्वास्थ्यकर्मी तथा सुरक्षाकर्मीसहित २५ जनाको रिपोर्ट नकारात्मक आएको थियो ।

संक्रमित सबैको स्वास्थ्य अवस्था सामान्य रहेको छ । कुनै पनि संक्रमितमा कोरोनाको लक्षण नदेखिएको स्थानीय स्वास्थ्यकर्मीहरूको भनाइ छ । संक्रमितहरूले सामान्य जीवनयापन गरिरहेका छन् ।

जिल्लामा संक्रमितको संख्या बढे पनि संक्रमित जति सबै क्वारेन्टिनमा नै रहेकाले समाजका संक्रमणको सम्भावना कम भएको प्रमुख जिल्ला अधिकारी वासुदेव घिमिरेले जानकारी गराएका छन् ।

मंगलबार दिउँसोसम्म रौतहटका विभिन्न क्वारेन्टिनमा ३ हजार ५०० पुगेको जिप्रकाले जनाएको छ । जिल्लामा दुई दिनमा आठ सयको संख्यामा क्वारेन्टिनमा थपिएका छन् । जिल्लामा संक्रमितको संख्या बढेसँगै आइसोलेसन व्यवस्थापनको समस्या बढेको देखिएको छ ।