नेपालमा कोरोना भाइरस (कोभिड–१९) फैलिन नपाउँदै ‘कोरोना हटस्पट’ बनेर सेलाएको उदयपुरमा लकडाउन खुलेयता लगातार संक्रमितहरु बढ्दैछन् । वैशाख ५ गते सदरमुकाम त्रियुगा नगरपालिका ३ भुल्केस्थित नुरी मस्जिदमा ११ भारतीयसहित १२ जमातिमा पहिलो पटक संक्रमण देखिएपछि त्रसित हुन पुगेको उदयपुरे समाज झण्डै डेढ महिनाको प्रयासले संक्रमण नियन्त्रणतर्फ आउँदा राहतको स्वास फेर्न पायो ।

एक महिनामा ३२ संक्रमित भेटिएको भुल्केलाई केन्द्रित गरी निरन्तर स्वाव संकलन र विरामीको उपचारपछि सबै निको भएर डिस्चार्ज भएसँगै जेठ अन्तिमदेखि उदयपुर कोरोनाको त्रासबाट मुक्त हुँदै गएको निश्कर्ष निस्क्यो । स्वास्थ्यकर्मी, प्रहरी प्रशासन र स्थानीय तहका जनप्रतिनिधिको निरन्तर प्रयासबाट संक्रमण नियन्त्रण हुँदै गएपछि हौसिएका स्थानीय सरकारले लकडाउन खोल्नुअघि नै जमघट र चलहलहल गर्न थालिसकेको थियो । स्थानीय व्यापार व्यवसायीले जवरजस्ती पसल, दोकान र बजार खोल्न थालेकै बेला असार मसान्त नजिकिएसँगै सरकारले बैंक तथा बित्तीय संस्थाहरु खोलेर आर्थिक कारोबार सुचारु गरेपछि सरोकारवालाहरु फेरि कोरोना संक्रमण बढ्ने लख काट्दै थिए ।  

अहिले उनीहरुको लख सही सावित हुँदैछ । प्रहरी प्रशासन र सरोकारवालाले जतिसुकै प्रयास गर्दा पनि बैंक, बित्तीय संस्था, स्थानीयतह र विकासे सरकारी कार्यालयमा सामाजिक दुरी कायम नगरी, मास्कसम्म राम्ररी नलगाई चहल पहल बढाउँदा संक्रमणबाट बँच्ने सामान्य उपायसम्म अवलम्बन भएको पाइएन । परिणामस्वरुप जताततै भिडभाड र जमघट बाक्लिन थाल्यो । लकडाउन खुले पनि होटेल, रेस्टुरेन्ट, व्युटिपार्लर, सैलुन नखोल्न गरेको सरकारी आदेश अवज्ञा गर्दै निर्धक्क सञ्चालनमा आए । जन्मदिन र बैवाहिक वर्षगाँठ मनाउन जम्मा हुनेदेखि जनाई फेर्न र सोमबारे, मंगलबारे ब्रत बस्नेसम्मको भिड बिभिन्न मन्दिर र खोला नदीमा ह्वात्तै बढेपछि कोरोना सार्न थप मद्धत गरेको छिपेको छैन ।  

समुदायस्तरमा कोरोना देखा परेको बेलका नगरपालिकामा नगर उपप्रमुखले सामाजिक सञ्जाल फेसबुकमार्फत राजीनामा दिने घोषणा गरेको विषयलाई लिएर प्रतिपक्षी दलहरुले संक्रमणको वास्तै नगरी सयौंको संख्यामा कार्यकर्ता बोलाएर बाक्लो भिड लगाउँदै ३/४ दिनसम्म बजार र नगरपालिकाअगाडि नाराबाजी र धर्ना दिनुले संक्रमणप्रति राजनीतिक दलहरुसमेत पटक्कै संबेदनसिल नभएको यकिन गर्छ । बेलकाले नगरपालिका केन्द्र रामपुर बजारमै समुदायस्तरमा संक्रमण देखिएपछि बजार ‘सिल’ गरेको थियो । तर, त्यस्तो सिल र निशेधाज्ञालाई प्रतिपक्षी दल र तिनका समर्थकले कुनै बारबन्देज ठानेनन्, बरु लगातार नाराजुलुस गरिरहे र रोकथाम गर्न आएको प्रहरीमाथि ढंगामुडा गरेर घाईते नै बनाएपछि दुईपक्षबीच झडपसमेत हुन पुग्यो ।

बेलकाका होटल सञ्चालक र कपडा व्यापारीमा संक्रमण देखिएपछि बजारमा निशेधाज्ञा जारी गरिरहँदा यता सदरमुकाम गाईघाटमा मालपोत कार्यालयका कर्मचारी संक्रमित पाइयो । कर्मचारी संक्रमित भेटिएपछि कार्यालय सिल गर्दै उनको ‘कन्ट्याक्ट ट्रेसिङ’ मा परेका २४ सहित जिल्लाका बिभिन्न ठाउँमा स्वाव संकलन गरी पठाइएको रिपोर्ट मंगलबार विहान आउँदा  थप १५ जना संक्रमित पुष्टि भएको छ । रिपोर्ट अनुसार त्रियुगा नगरपालिकामा २ महिलासहित ८ र बेलका नगरपालिकामा ३ महिलासहित ७ जनामा संक्रमण देखिएको जिल्ला स्वास्थ्य कार्यालय उदयपुरले जनाएको छ ।  

त्रियुगाका सबै संक्रमित मालपोतकै कर्मचारी र पहिलो संक्रमितको परिवारका भएको जनाइएको छ । पहिलो संक्रमितको परिवारमा ६२ र ३० वर्षीया दुई महिला तथा बाँकी ६ जना ३२, ३२, २६, ३८, ४२ र ४४ वर्ष उमेरका रहेको स्वास्थ्य कार्यालय प्रमुख मोहन सुबेदीले बताएका छन् ।  

त्यस्तै बेलकाका सबै संक्रमित वडा नंं ९ का रहेको उनले बताए । बेलकाका संक्रमितहरु २०, २० र ६० वर्षका महिला र १७, १८, ३१ र ६८ वर्षका पुरुषहरु रहेको सुबेदीले बताए । यसअघि कटारीको एक निजी स्वास्थ्य संस्थामा उपचार गरी विराटनगर रिफर गरिएकी ताप्लीकी एक ४३ वर्षीया महिलामा संक्रमण देखिएपछि कटारी बजार एकसातासम्म सिल गरिएको थियो ।  

नेपाल भारत सीमा काकडभिट्टा नाकामा कार्यरत एक कर्मचारीकी श्रीमतीमा गत हप्ता संक्रमण पुष्टि भएपछि चौदण्डीगढी नगरपालिका पनि सिल गरिएको छ । बिदा मनाउन ससुराली आएका उनी काकडभिट्टा फर्केपछि पिसिआर चेक गर्दा संक्रमण पाइएपछि उनकी श्रीमति र छोराछोरीको पिसिआर चेक गरिएको थियो । दुई छोराछोरीमा संक्रमण नदेखिए पनि आमा संक्रमित देखिएको थियो ।  

स्वास्थ्य कार्यालयका स्रोत व्यक्ति (फोकल पर्सन) लौकाजी राईका अनुसार उदयपुरमा हालसम्म १ हजार ५ सय ५२ महिला र ४ हजार ४ सय ६३ पुरुषको स्वाब परीक्षण भईसकेको छ । जसमध्ये ३० महिलासाहित १ सय ४ जनामा संक्रमण पुष्टि भएकामध्ये ८५ जना निको भएर घर फर्किसकेका छन् । १ महिलासहित ४ जनाको उपचार भईरहेको छ । नयाँ १५ संक्रमितलाई उपचारार्थ कोभिड अस्पताल पठाउने तयारी भईरहेको छ ।

सबभन्दा बढी संक्रमित त्रियुगा नगरपालिकाका १६ महिलासहित ५९ जना भेटिएका छन् भने बेलकामा ९ महिलासहित ३१ जना, कटारीमा ३ महिलासहित ४ जना, चौदण्डीगढीमा १ महिलासाहित २ संक्रमित पाइएको छन् । उदयपुरगढी गाउँपालिकामा २ जना र ताप्ली गाउँपालिकामा १ महिलासहित ३ जना संक्रमित पाइदा रौतामाई र लिमचुङुङमा कुनै संक्रमित अहिलेसम्म नदेखिएको राईले बताए ।