ताप्लेजुङको उत्तरी सीमावर्ती क्षेत्र फक्ताङ्लुङ गाउँपालिकाका लागि खाद्यान्नसहित व्यक्तिगत स्वास्थ्य सुरक्षाका सामग्री (पीपीई) दिएको चीनको स्वशासित क्षेत्र तिब्बत सरकारले यहाँका स्वास्थ्यकर्मीका लागि ठूलो परिमाणका थप पीपीई दिएको छ ।
तिब्बत सरकारले ताप्लेजुङ जिल्लाभरका लागि दिएको पीपीईसहितका सामग्री रिउ बजारसम्म आई पुगेको जानकारी आफूले पाएको ताप्लेजुङका प्रमुख जिल्ला अधिकारी डोरेन्द्र निरौलाले बताए । नेपाल सरकारको स्वीकृति लिएर ताप्लेजुङका लागि पठाएको सामग्री बुझ्नका लागि तिब्बत सरकारले आग्रह गरेको समेत निरौलाले बताए । निरौलाका अनुसार तिब्बत सरकारले ६ आईटमका स्वास्थ्य सुरक्षाका सामग्री पठाएको जनाएको छ । प्रारम्भिक जानकारी अनुसार १ सय थान थर्मगन, करिव १ लाख १० हजार थान बढी सर्जरी मास्क, १ हजार २ सय थान एन–९५ मास्क, पीपीई र सेनीटाइजरसहितका सामग्री रहेका छन् ।
अनौपचारिक रुपमा यति परिणामको व्यक्तिगत तथा स्वास्थ्य सुरक्षाका सामग्री भएको जानकारी पाए पनि पत्रमा भने परिमाण उल्लेख छैन । यो सामग्री व्यवस्थापनका लागि तिब्बत सरकार र नेपाली प्रशासनसंग समन्वयको काम गरिरहेका फक्ताङ्लुङ गाउँपालिकाका प्रवक्ता छेतेन वालुङ शेर्पालाई उधृत गर्दै प्रजिअ निरौलाले बताए अनुसार मौसम अनुकुल हुँदासाथ ति सामग्री नेपाल–तिब्बत सीमावर्ती क्षेत्र टिपतालासम्म आई पुग्ने छ ।
त्यहाँबाट आफ्नो गन्तब्यसम्मको ढुवानीसहितको व्यवस्थापन भने नेपाली प्रशासन आफैंले गर्नुपर्ने छ । केहिदिन अघि मात्र तिब्बत सरकारले सीमावर्ती क्षेत्र फक्ताङ्लुङ गाउँपालिकाका लागि खाद्यान्नसहित व्यक्तिगत स्वास्थ्य सुरक्षाका सामग्री पठाएको थियो । ति सामग्री पनि हिउँको प्रभाव कायमै रहेको अवस्थामा हिउँ पन्छाउँदै कष्टपूर्ण ढंगले टिपतालासम्म ल्याई पुर्याएर नेपाली पक्षलाई जिम्मा दिएपछि तिब्बती अधिकारीहरु फिर्ता भएका छन् ।
