मास्क नलगाएर हिड्ने एक सय जनालाई जुम्ला प्रहरीले कारवाही गरेको छ । जिल्ला प्रशासन कार्यालय जुम्लाका अनुसार पहिलो दिनमा एक सय जनालाई कारवाही गरिएको हो । मास्क नलगाउनेलाई नियन्त्रणमा लिएर संक्रामक ऐन अनुसार एक सय रुपैयाँ जरिवाना तिराएर सम्झाई बुझाई गरेर पठाउने गरिएको हो ।
मास्क नलगाउने कम छन् । ९० प्रतिशतले मास्क लगाउँछन् । जुम्ला प्रहरी प्रमुख डिएसपी लालबहादुर धामीले भने, ‘अधिकांशले खल्तीमा मास्क बोकेर पनि नलगाएर हिडेको भेटियो ।’
सदरमुकाम खलंगाको बालमन्दिर, कालेखोली चोक र बसपार्कमा प्रहरी परिचालन गरिएको छ । डिएसपी धामी भन्छन्,‘मास्क नलगाउनेलाई समातेर सचेतना दिने, मास्क लगाउन भन्ने र अटेरी गर्नेलाई कारवाही गर्ने गरिएको छ ।’
मास्क नलगाउनेबाट १० हजार रुपैयाँ राजश्व संकलन भएको छ । बिहिबार प्रमुख जिल्ला अधिकारी भुपेन्द्र थापा आफैं घरदैलोमा पुगेर मास्क वितरण गरेका थिए । उनले मास्क लगाएर कोराना भगाउनको लागि आग्रह गरेका थिए । सामाजिक दुरी कायम गर्न र मास्क लगाउन, सेनिटाइजर र साबुन पानीले हात धुनको लागि सचेत गराएका थिए ।
पछिल्लो समय कोराना संक्रमितको संख्या बढिरहँदा जुम्लामा उच्च सतर्कता अपनाइएको हो । जुम्लामा आठ सय क्वारेन्टिन बेड छन् । एक सय २० बेडको आइसोलेसन छ । यहाँका चार स्थानमा हेल्थ डेस्क स्थापना गरिएको छ । जुम्लाका ६९ जना संक्रमित निको भएर घर फर्किसकेका छन् । दैनिक कोराना परीक्षण भइरहेको कर्णाली स्वास्थ्य विज्ञान प्रतिष्ठान शिक्षण अस्पताल जुम्लाले जनाएको छ ।
मास्क नलगाउनेलाई एक सय रुपैयाँ जरिवाना गरेर एक मास्क लगाइदिएर पठाउने गरिएको छ । जिल्ला जनस्वास्थ्य सेवा कार्यालय संग समन्वय गरेर मास्क उपलब्ध गराउने गरिएको जिल्ला प्रशासन कार्यालय जुम्लाले जनाएको छ । प्रमुख जिल्ला अधिकारी भुपेन्द्र थापा अनिवार्य मास्क लगाएर मात्र घरबाहिर निस्कन आग्रह गर्छन् ।
उनले भने,‘कोराना भाइरसको संक्रमण फैलनमा सक्ने खतरा छ । त्यो बाट जोगिन सबै सचेत हुनुपर्छ ।’
सहायक प्रमुख जिल्ला अधिकारी ओमप्रकाश देवकोटाका अनुसार मास्क नलगाएर ५२ जना बालबालिकालाई सम्झाइ बुझाइँ घर पठाइएको छ । केहीलाई मास्क दिएर पठायौँ । केहीलाई सम्झाएर पठाएका छौँ, उनले भने,‘उनीहरुले आफ्नै सुरक्षाको लागि मास्क प्रयोग गर्नु पर्ने भन्ने महशुस गरेर फर्किएका छन्।
