वार्ताबाट समस्या समाधान गर्न सरकार इमानदार नभएको भन्दै नो केवलकार समुहले आन्दोलनको घोषणा गरेका छन् । सोमबार पत्रकार सम्मेलन गरी माघ २९ गतेदेखि आन्दोलन गर्ने जनाएका छन्।

पत्रकार सम्मेलनमा संघर्ष समितिको तर्फबाट बोल्दै राष्ट्रिय मुक्ति पार्टी नेपालका अध्यक्ष राजेन्द्र महतोले फागुन ८ गते मुकुमलुङ पद यात्रा गर्ने बताए । आन्दोलनको कार्यक्रममध्ये फागुन ६ देखि ८ गतेसम्म ‘मुक्कुमलुङ बचाऔं पदयात्रा’ घोषणा गरिएको छ । उनले फागुन ८ गते समाजिक न्याय दिवस भएकाले मुन्धुम सभ्यता, मुकुमलुङको न्यायको निम्ति पदयात्रा गर्ने उल्लेख गरे । उनले भने, 'म त्यहा जान्छु, तपाईंहरु पनि जाऔं र विशाल पद यात्रा गरौं । अब लिम्बू एक्लै लडदैन, अब कुनै समुदाय एक्लाएक्लै लडनु जरुरी छैन। डिभाइड एन्ड रुल अब चल्दैन । छुट्टाछुट्टै लडोस भनेर नै कोहि कोहि बहारियाहरु यो आन्दोलनमा आउनु भन्ने भाष्य निर्माण गर्न खोज्दै छ तर अब त्यो हुदैन। अब हामी मिलेर लड्छौ ।'

केबलकार निर्माण सम्बन्धमा वार्तामा बोलाइरहनुको कुनै अर्थ नभएको उनको जिकिर थियो ।

अहिलेको सरकार निरंकुश तर्फ अघि बढेको आरोप लगाउँदै महतोले बोल्न पाइदैन भन्ने आसयको कानुन ल्याउन खोज्नु निरंकुशताको उदाहरण भएको टिप्पणी गरे ।

आन्दोलनकारीले केबलकारको अनुमति तथा सम्झौता खारेजीका लागि दबाब दिन फुङलिङ नगरपालिकाको कार्यालय घेराउ, केबलकार निर्माण सामग्री ढुवानी नगर्न आग्रह, काठमाडौं, इटहरी र बिर्तामोडमा विरोध सभा गर्ने भएका छन्।

यससँगै केबलकारको सम्झौता खारेजीका लागि कोशी प्रदेशका सबै जिल्ला प्रशासन कार्यालय मार्फत ज्ञापनपत्र बुझाउने, प्रदर्शन गर्ने पनि उनीहरूले तय गरेका छन्। त्यसपछि अनिश्चितकालीन यातायात बन्द र आमहडताल गर्ने चेतावनी दिएका छन्।