युरिया मलको चरम अभाव भएको मौका छोपेर सिन्धुलीमा बढी मूल्यमा युरिया मल बेचेको आरोपमा प्रहरीले एक जनालाई पक्राउ गरेको छ । विश्वभर फैलिएको कोरोना भाइरसका कारण मुलुक लकडाउन भएकै समयमा बढी मूल्यमा युरिया मल बेचेको आरोपमा जिल्ला प्रहरी कार्यालय सिन्धुलीले एक व्यापारीलाई पक्राउ गरेको हो ।

लकडाउनकै बीचमा सिन्धुलीका जुनारको बगैचामा वर्षौदेखि देखा परेको किरा ब्यवस्थापन गर्न प्रोटिनबेट छर्न सुरु गरिएको छ । जुनार क्षेत्रमा नमुनाको रुपमा प्रयोग गरिएको क्षेत्रगत किरा नियन्त्रण कार्यक्रम गत वर्ष प्रभावकारी देखिएपछि यस वर्ष जुनारको बगैचामा प्रोटिनबेट (औषधि) छर्न सुरु गरेको प्रधानमन्त्री कृषि आधुनिकीकरण परियोजना जुनार सुपर जोन कार्यालयले जनाएको छ ।

उखु किसानलाई सरकारले दिने भुक्तानी रकममै ढिलाइ भएको छ । किसानले उखु उद्योगलाई उखु बिक्री गरेपछि उखुको कूल मूल्यको भ्याटवापत किसानले पाउनु पर्ने फिर्ता रकम सरकारले दिनु पर्ने हुन्छ । सरकारले किसानको खातामा नै रकम पठाउने व्यवस्था गरेको भए पनि भुक्तानको लागि ढिलो भइरहेको पाइएको छ ।

भालुको आक्रमणबाट खोटाङमा एक युवा घाइते भएका छन् । स्थानीय धुपीढुंगा वनमा गएका बेला भालुको आक्रमणमा पर्दा साकेला गाउँपालिका–१ बाँझेच्यानडाँडा सेखुवाका २६ वर्षीय जयकुमार राई घाइते भएका हुन् ।

कोरोना भाइरस (कोभिड-१९) को संक्रमण फैलन नदिन देश लकडाउन भइरहदाँ मारमा परेका किसानहरु तरकारी बालीमा लागेको रोगले चिन्तित छन् । धादिङको थाक्रे गाउँपालिका वडा नं ११ वालुवाफाँट तथा आसपासका क्षेत्रमा लगाइएको करेला बालीमा रोग लागेको छ । ७२ परिवार किसानले दुई सय छ रोपनी जग्गामा लगाएको करेला खेतीमा पँहेलो पात हुने र मुन्टा ठिमुरिने रोग देखिएपछि किसान चिन्तित भएका हुन् ।